Main Kaun Hun, Kya Hun

Kabhi khaak, kabhi pathhar, sang dil men main
Ana parast, magroor, har mushkil men main

Num chashm, soz e dil, har gham men hun
Jaur o sitam, karam aur narm dil men main

Shireen zabaan, uski talkhi men bhi main
Naasoor aur zakhm e mundamil men main

Sirr e nihaan hun, mazhar hun main zuroor
Na kaami meri, hun kaamil men main

Thaharte waqt, guzarte lamhon men bhi
Har gaam , har haail, har manzil men main

Zindagi hun, qaza bhi main zuroor
Asr e haal, maazi aur mustaqbil men main

Mujh bin nahin hai tu na jahan tera, insan
Talatum o tufaan, ret o sahil men main

Ijaaradaari nahin kisi ki mujh per koi, ‘sahil’
Khuda hun tera magar, har dil men main

Ashok sawhny ‘Sahil’