Kaun jhaank saka hai ‘sahil’ kisi dil ke andar koi

Kaun jhaank saka hai ‘sahil’ kisi dil ke andar koi
Kis ne dekha hai num chashm ka woh sumundar koi

Jeetna ho gar dil kisi ka to yaad rahe tumhen
Dayaar e dil tak pahunche baat ek mukhtasar koi

Aaj har ja jhagre fitne dekho, har su koi jahangir
Kaash ke aaye jahan men ab phir se khizar koi

Himmat sab se awwal hai mat haarna isey kabhi
Shikasta dil ko to na mila kahin gauhar koi

Bhoola hai ghaflat men insan is baat ko, afsos
Ke milta nahin hai kisi ko shams o qamar koi

Ho jaao gar gumraah kabhi zindagi men yaro
Kaash mil jaaye phir rahbar tumhen aur rahguzar koi

Ranj o gham ki khud karo masihaayi tum ‘sahil’
Gar na karey waqt na hi phir chaarahgar koi

Num chashm teary eyed
Dayaar e dil the region of the heart
Mukhtasar brief
Jahangir emperor
Khizar a prophet considered immortal a spiritual guide
Shikasta haara hua
Gauhar gem
Shams o qamar sun n moon
Rahbar guide
Rahguzar raasta
Masihayi to look after to care for
Chaarahgar doctor

Ashok sawhny ‘Sahil’