Aarzu hai yeh kaisi taskheer e kaaenaat ki

Aarzu hai yeh kaisi taskheer e kaaenaat ki
Reh gayin baaten kahin hum se mulaqaat ki

Marasim men tijarat to hai zahr se badtar
Ulfat men guftagu na ho kabhi khairaat ki

Har ghari to nahin hoti dil ke behlaane ko
Subh shaam hon saazgaar to baat kya raat ki

Gham bhi ek mausam hai baharon ki maanind
Koi zaamin to nahin hai bahaar e yak saa’at ki

Ahd e maazi kul azaab to na tha, shaair tera
Haafize ko samjha, aur baaten na kar aafaat ki

Zeest, tu jaanti hai mujhe mere khayalaat ko
Fikr mujhe hai nahin teri jeet ya meri maat ki

Khuda se bartar to nahin hai koi vaaiz
Insan woh kya jo karta hai baaten auqaat ki

Pyaar mahabat to rahegi dunya men aabaad
Kar is ki tu baaten ‘sahil’ awwal is jazbaat ki

Ashok sawhny Sahil