Safar to safar hai ‘sahil’ koi mausam ka bayaan nahin

Safar to safar hai ‘sahil’ koi mausam ka bayaan nahin
Jaise sehar naam subh ka, aftab ka woh ayaan nahin

Sach kitna hai daleelon men, yeh to daleelen jaanen
Sabooton ka bharosa kya, woh sach ka bayaan nahin

Zabt e sukhan hai aqlmandi, posheeda us men sukoon
Khamosh rehnewala naaseh, becharah, be zubaan nahin

Daaman pe daagh, chaak girebaan, mohavarey hain bas
Ghurbat ke alamat be shak, ruswayi ke nishaan nahin

Mandir masjid aur kalisey men jaane se kya hua
Bhooley jo insaniyat ko, woh to phir insan nahin

Sar jhuka kar chalo yaro ibadat khud ho jayegi
Kaakh o gulzaar ka maalik hona to koi shaan nahin

Chaman men gul o khaar hain, dil bhi ek gulsitaan
Khud na chaahe dhadakta dil to woh bayabaan nahin

Jazbaat pecheeda hote hain wazahat ki zururat hai
Jo bhi uthe dil men tere woh to ‘sahil’ armaan nahin

Ashok sawhny Sahil