Aaj khud se kiya vaada main ne aur apne zameer se
Ke hilunga na main phir kabhi us sach ki lakeer se
Phir fitne jhagre tark kiye aur iraade kiye mohkam
Ke shireen hogi meri guftagu har adu o zaheer se
Nahin hoti umeed kisi se asl faqir ko siwa khuda se
Phir dekhta hai kyon ameer usey kaho tehqeer se
Naazuk hain sab ke dil zurur, jazbaat sab be sakhta
Jeetey nahin jaatey dil kisi be hiss taqreer se
Vaaiz, aasaan sa yeh falsafa gar jaan le har insan
Phir baadshah banega man men woh fuzul haqeer se
Khwaab nahin hai zindagi, raaste nahin humwaar
Kaamyaabi kab mili kisey khwabon ki taabeer se
Aks pe aitbaar kaisa, saaye se kya umeed kaho
Shakhsiyat ayaan na hui kisi ki uski haseen tasweer se
Kya hua kaise hua raaegaan hain yeh sawaal sab
Firasatmand wohi hai yaro jo giley na karey taqdeer se
Daastaan aamad o raft ki hai yeh roodad e zindagi
Yaqin nahin ho to kabhi puchhiye kaarwaan e meer se
Sochta, likhta, padhta reh ai, ‘sahil’, tu zurur
Banega tu bhi shayad falsafi ik roz dabeer se
