Dil men sabke hai khuda aur shaitaan bhi

Dil men sabke hai khuda aur shaitaan bhi
Zameen aur woh neela aasmaan bhi

Amezish o mulgham hai sab kuchh yahan
Hasrat aur paakeezah armaan bhi

Har dil men gumaan aur imaan bhi
Har zehn men nafa aur nuqsan bhi

Chaand sitaron ki mehfil men dekho aaj
Kuchh bujhte diye, chund darakhshaan bhi

Mezbaan yahan aur mehmaan bhi
Khiradmand bahot, kuchh nadaan bhi

Woh khaali haath donon, lakiron ka khel
Aane jaane ka sab pe saamaan bhi

Qareeb kitne hain insan o la makaan bhi
Nek girebaan aur na paak daamaan bhi

‘Sahil’, ek nafas ki baat hai zindagi
Dekh le paas kitni hai qaza aur jaan bhi

Ashok sawhny Sahil