Na tamanna gul ki hai na hi kisi khaar ki ab

Na tamanna gul ki hai na hi kisi khaar ki ab
Aarzu na jeet ki na hi fikr kisi haar ki ab

Dil figaron ka jahan badla hai zamaan bahot
Kaun dega khabar kisey kisi sogwaar ki ab

Kehte they ulfat usey pyaar jab sab ka sacha tha
Kharid o farokht ki dunya men baat kis pyaar ki ab

Kabhi waqt se to puchhiye fursat kitni hai usey
Masrufiyat hai pesha sab ka baat kya raftaar ki ab

Kis ki sunen, kis ki maanen, khutbe aur taqreeren sab
Imaan kabhi pukhtah tha hai baat bas aitbaar ki ab

Mubaseer hai ‘sahil’ sahil per, tamaash been woh tanha
Naqsh e pa sab reton per hai intezaar us paar ki ab

Ashok sawhny ‘Sahil’