Ab neend chahiye mujhe khwaab nahin

Ab neend chahiye mujhe khwaab nahin
Nasha magar koi sharaab nahin

Miley sahra men nakhlistaan mujhe
Koi vaada e baatil e saraab nahin

Sahib e sukhan ki jagah apni hai yaro
Per husn o tabassum ka to jawab nahin

Dil dhadkta chahiye zindagi ko zurur
Magar, dhadakta dil betaab nahin

Daulat apni ka hisaab jaante hain sab
Per, waqt hai kitna kisi ko hisaab nahin

Nazara chaman ka hi kaafi hai bahot
Ab darkaar mujhe saman o gulaab nahin

khushi bhi thodi si kabhi milti rahey
Ab aarzu meri koi zabardast sailaab nahin

Ibadat khuda ki to farz hai yaro
Sawaab milta hai lafzon men jawaab nahin

Tere shukr ka ek misra hi kaafi hai, ‘sahil’
Rab ki mehr ka to hota hai koi hisaab nahin

Ashok sawhny Sahil