Sukoot e sumundur na miley kabhi darya e payaab men

Sukoot e sumundur na miley kabhi darya e payaab men
Faani naqsh e pa milenge reton ke hamen aab men

Idhar udhar jaane kidhar talaash taskeen ki hai sab ko
Logo, sukoon to pinhaan rehta hai har dil e taab men

Shafqat o inkisaari inheen men mukammal tameez hai
Seedhi saadi muskurahat kya tabassum e nayaab men

Kab banti hai mauj, mauj se woh talatum zabardast
Sahil ke tamashaiyo kabhi jhaanko tum girdaab men

Mai e naab peene walo baaten nashe ki batao
Kya suroor o madhoshi hai utni, jitni hai sharaab men

‘Sahil’, naseehaton men kitna sach aur kitna hai falsafa
Chain kisi ko kya milega haalat e khaana kharaab men

Ashok sawhny Sahil