Jo tufaan ka rehta hai muntazir woh sahil hai

Jo tufaan ka rehta hai muntazir woh sahil hai
Jalta rahey jo umr bhar woh raushan dil hai

Dekha ho chaman ko jis ne jalte huay kabhi
Usi ko phir dosto mere shola e gham haasil hai

Raakh dekhi to kya dekha bas dil bujha hua
Raakh to sab ki likhi hui intehayi manzil hai

Mahv e khuda men ghuroob hai dervesh
Ya phir us ka junoon ek raqs e bismil hai

Aasaan kya hai naaseh ab tu hi bata
Hum jaante hain jeena khaasa mushkil hai

Vaaiz, faani hai sab kuchh Rab ke jahan men
Sirf aamad o raft hi to mustaqil hai

Bas, andaaz e bayaan ki baat hai ‘sahil’
Kal ki subh kahen usey ya woh mustaqbil hai

Ashok sawhny ‘Sahil’